Grund, dvalar- og hjúkrunarheimili

Karlakórinn Fóstbræður hefur í tugi ára glatt heimilisfólk með tónleikum í hátíðasal heimilisins. Það ríkir alltaf tilhlökkun í húsinu þegar von er á þessum frábæra hópi í heimsókn. Margir tugir kjólfataklæddra herramanna streyma í húsið og hefja svo upp raust sína undir stjórn Árna Harðarsonar söngstjóra. Mennirnir gefa alla vinnu sína við tónleikana og alltaf er fullt útúr dyrum þegar þeir koma í heimsókn.  Þúsund þakkir kæru Fóstbræður fyrir að koma og gleðja heimilisfólk með þessum eftirminnilega hætti.

Daninn Mikael Stampe Skousen hefur haldið tryggð við Grund í áranna rás en hann vann á heimilinu á árunum 1988-89. Þá hafði hann klárað menntaskólann og vildi leita á vit ævintýra. Hann kom með tjald og smá peninga með sér til landsins en hafði enga fasta vinnu. Eftir krókaleiðum komst hann að því að það væri kannski vinnu að fá á Grund og það reyndist raunin. Hann komst líka að því að þar voru fyrir margir Danir í vinnu. Allir bjuggu þeir í starfsmannahúsi á Minni Grund og á Hofsvallagötu 24. Þetta reyndist mjög skemmtilegur tími segir Mikael sem vann í þvottahúsinu og þreif lyftuhúsið. Í staðinn fékk hann húsnæði og vasapeninga sem og matarmiða sem hægt var að kaupa sér fyrir mat á Grund. Mikael heillaðist af landinu og fólkinu og var hér á dögunum í heimsókn í fimmta skipti. Í þetta sinn voru með honum Rasmus, sonur hans og foreldrar. Mikael fékk lánað lítið hús í Ási í Hveragerði og hefur farið um landið með foreldra sína m.a. að Seljalandsfossi, í Jökulsárlón, Hrífunes og skoðað Skaftafell. Hann er mikið fyrir útivist og hefur farið á fjöll á þessum ferðum sínum og gengið t.d. um Hornstrandir. "Það er gott að koma til Íslands og ég er einstaklega þakklátur forstjóra Grundar að taka alltaf svo vel á móti mér þegar ég kem til landsins."