Við þekkjum öll tilfinninguna að rífa af okkur plástur. Sérstaklega þegar við vorum yngri, þá hræddumst við, sum hver í það minnsta, að rífa af okkur plásturinn. Og gerðum það hægt og varlega. Stundum féllst maður á beiðni foreldranna um að gera það hratt, það var vissulega verra en stóð yfir í mun styttri tíma. Það er síðan huglægt mat hvers og eins að vega og meta kosti og galla, hvorrar aðferðar fyrir sig, mikill sársauki í stuttan tíma eða lítill sársauki í langan tíma. Þó að þetta eigi ekki beina tilvísun í yfirstandandi tilslakanir sóttvarna á vegum ríkisvaldsins, þá finnt mér engu að síður að þetta eigi pínu samleið. Í fyrstu virtust stjórnvöld ætla að rífa plásturinn hægt og rólega af, en mér sýnist verulegur þrýstingur vera á þau að kippa honum snögglega af sárinu. Því fylgja kostir og gallar, eins og flestu í okkar lífi. Eðli máls samkvæmt verða fleiri smit, fleiri forfallaðir til vinnu, fleiri leggjast inn á LSH í einu og svo framvegis ef tilslakanir verða hraðar. En þetta mun líklega standa mun skemur yfir. Mjög svo umtalað hjarðónæmi mun nást á skemmri tíma og þar með verður þessi andstyggðar veira, covid 19, svo gott sem úr leik í þjóðfélaginu. Við eigum engu að síður eftir að eiga við eftirköst hennar um all nokkurt skeið. Heilbrigðisþjónustan á eftir að jafna sig, vinna upp biðlista sem voru nú margir hverjir alltof langir fyrir veiruna, atvinnulíf og þá sérstaklega ferðaþjónustan á eftir að ná jafnvægi og svo mætti lengi telja. Fyrir okkur sem rekum hjúkrunarheimili skiptir miklu máli að þessari baráttu ljúki sem fyrst. Snögg afrifa plástursins mun vissulega valda okkur meiri vandræðum en ella, en til mun skemmri tíma. Nú þegar hafa all nokkrir heimilis- og starfsmenn Grundarheimilanna sýkst af covid 19 en hinir „eiga það eftir“ ef þannig má að orði komast. Og á nokkrum einingum Grundarheimilanna er ástandið talsvert alvarlegt, bæði veikindi heimilis- og starfsmanna og þar af leiðandi erfitt að manna vaktir eins og nauðsyn krefur. Engu að síður tel ég að orðatiltækið „illu er best aflokið“ eigi bara ágætlega við í þessu efni. Eflaust eru einhverjir heimilismenn, aðstandendur þeirra, starfsmenn og stjórnendur Grundarheimilanna ekki sammála mér með þetta, en það er líka bara allt í góðu. Skoðanaskipti eru af hinu góða. Kipppum plástrinum af í hvelli. Kveðja og góða helgi, Gísli Páll, forstjóri Grundarheimilanna

Árni Friðrik sigraði Þorrabingó Grundar 2022. Hann fékk bindi og klút í verðlaun sem hann var ekki lengi að skreyta sig með.

Það var létt yfir mannskapnum í Mörk í dag enda boðið upp á þorramat og allt sem honum tilheyrir. Svei mér þá ef Covid var ekki bara gleymt og grafið í smástund. Góða helgi

Öll PCR próf sem voru tekin í dag reyndust neikvæð. Það var stemning í hádeginu hjá okkur á Litlu og Minni Grund og loksins fengum við þorramatinn. Flestir eru lausir úr einangrun en þó ekki allir og við opnum fyrir heimsóknir á Litlu og Minni Grund á ný næsta þriðjudag. Við erum fegin að sjá fyrir endann á þessu og förum glöð inn í helgina

Bóndadagurinn var fyrir nokkru og pínulítið seint að birta þessar myndir en stóðumst bara ekki mátið. Herrarnir á Grund fengu allir glaðning á bóndadaginn og voru alsælir. Harðfiskur og smjör féll í kramið en líka malt og appelsínið og súkkulaðið.

Við ætlum að rýmka heimsóknartilmæli frá og með 1 febrúar. Hver heimilismaður getur fengið 1-2 heimsóknargesti á dag, þarf ekki að vera sá sami alla vikuna. Heimsóknartímar eru opnir. Grímuskylda er í heimsóknum og gestir eru beðnir um að dvelja ekki í sameiginlegum rýmum. Ef heimilismenn fara af heimilinu hvetjum við þá til að gæta ítrustu sóttvarna, vera með grímu og sótthreinsa hendur. Við biðjum heimsóknargesti um að koma ekki í heimsókn ef þeir: Eru í sóttkví eða smitgát Eru í einangrun vegna Covid-19 Eru með einkenni (kvef, hósta, hita, höfuðverk, beinverki, þreytu, kviðverki, niðurgang). Hafa dvalið erlendis undanfarna daga og eru ekki komnir með neikvæða niðurstöðu úr skimun eftir komuna til landsins. Þetta á við um bólusetta gesti, óbólusettir þurfa að gangast undir tvöfalda skimun og sóttkví eins og reglur á landamærum segja til um. Viðbragðsteymi Grundarheimilanna

Við ætlum að rýmka heimsóknartilmæli frá og með 1 febrúar. 1. Hver heimilismaður getur fengið einn til tvo heimsóknargesti á dag, þarf ekki að vera sá sami alla vikuna. 2. Heimsóknartími er kl.13-18 eða eftir nánara samkomulagi. 3. Grímuskylda er í heimsóknum og gestir eru beðnir um að dvelja ekki í sameiginlegum rýmum. 4. Ef heimilismenn fara af heimilinu hvetjum við þá til að gæta ítrustu sóttvarna, vera með grímu og sótthreinsa hendur. 5. Við biðjum heimsóknargesti um að koma ekki í heimsókn ef þeir: • Eru í sóttkví eða smitgát • Eru í einangrun vegna Covid-19 • Eru með einkenni (kvef, hósta, hita, höfuðverk, beinverki, þreytu, kviðverki, niðurgang). • • Hafa dvalið erlendis undanfarna daga og eru ekki komnir með neikvæða niðurstöðu úr skimun eftir komuna til landsins. Þetta á við um bólusetta gesti, óbólusettir þurfa að gangast undir tvöfalda skimun og sóttkví eins og reglur á landamærum segja til um. Viðbragðsteymi Grundarheimilanna

Í byrjun þessarar viku greindust tæplega 30 heimilismenn Litlu og Minni Grundar með Covid 19. Eitthvað sem hefði sett alla starfsemi heimilisins á aðra hliðina fyrir rúmlega ári síðan þegar enginn var bólusettur, hvorki heimilismenn né starfsmenn. En nú er öldin önnur, og miklu betri. Þeir sem eru þríbólusettir eru ekki mikið veikir og munu vonandi hrista þetta af sér eins og hverja aðra flensu. Sama er að segja um þá starfsmenn sem smitast, þeir eru lítið eða ekkert veikir. Í umræðunni um bólusetningar gegn Covid 19 hefur margt komið fram og líklega ekki allt alveg samkvæmt sannleikanum. Síðast í gær var fullyrt í fréttum á alnetinu að rannsókn í Skotlandi sýndi fram á að það væru meiri möguleikar á að láta lífið af völdum Covid 19 ef viðkomandi hefði verið bólusettur. Eitthvað sem ég get ekki tekið undir. Enda var ekki vísað til hvaða rannsóknar var um að ræða. En áróður sem þessi kemst eflaust í undirmeðvitund einhverra, þeirra sem lesa til dæmis bara fyrirsagnir og kynna sér ekki málin til fullnustu. Og það er ekki gott, því að mínu mati, athugið ég er ekki læknis- eða hjúkrunarmenntaður, þá hefur bólusetning heimilismanna hjúkrunarheimila bjargað mjög mörgum mannslífum. Án bólusetningarinnar sem við njótum að hafa fengið í dag, hefði eflaust talsverður fjöldi heimilismanna Grundar látið lífið. Eitthvað sem enginn sem rekur hjúkrunarheimili vill að gerist. Bólusetning bjargar mannslífum, á því er enginn vafi í mínum huga. Kveðja og góða helgi, Gísli Páll, forstjóri Grundarheimilanna

Heimilisfólk í Mörk útbjó þessa skemmtilegu þorraskreytingu sem prýðir anddyri heimilisins. Þorrinn að sigla inn í matsalinn sem á vel við þar sem kræsingarnar þessa dagana hafa borið keim af súrmeti og því sem tilheyrir þessum þjóðlega tíma.

Umræða í fjölmiðlum og samfélagsmiðlum er allskonar. Oft á tíðum notað hæsta stig lýsingarorða og ekkert gefið eftir í yfirlýsingum, fúkyrðum og skömmum. Og oftar en ekki er persóna viðkomandi embættis til dæmis, dregin inn í óvægna umræðu í stað þess að gagnrýna og rökræða málefnið sem ágreiningur snýst um. Að sjálfsögðu er ekki ætlast til þess að allir séu sammála, eða allir hafi sama smekk og sem betur fer þá er skoðana- og tjáningafrelsi í landinu. Það eru ekki allir jarðarbúar svo heppnir. En margir hverjir veigra sér við að tjá sínar skoðanir af því að þeir fá skammir, uppnefni, einelti og skítkast af því að þeir eru ekki á sömu skoðun og þeir sem telja sig allt vita og geta. Við sem rekum hjúkrunarheimili landsins höfum verið í miklum öldusjó undanfarin tvö ár. Mikið hefur gengið á, heimsóknarbann, heimsóknartakmarkanir, veikindi heimilis- og starfsmanna, bólusetningar heimilis- og starfsmanna, margskonar takmörkun á starfseminni, erfiðleikar í rekstri og svo mætti lengi telja. Við höfum gert allt sem við getum til að hámarka hag og velsæld þeirra sem búa hjá okkur og starfa. Slíkar aðgerðir eru og munu alltaf verða umdeildar, en þær eru gerðar í góðri trú og byggjast á þeim bestu upplýsingum og gögnum sem fyrir liggja. En þessar ákvarðanir eru eðlilega umdeildar. Og það er fínt að rökræða þær, skiptast á skoðunum og rökum, með og á móti. Ég er meira en til í svoleiðis skoðanaskipti. En það er lágmarkskrafa að vera kurteis. Og lang- langflestir eru það, en ekki alveg allir. Kurteisi kostar ekkert, og skilar alltaf miklu meiri árangri en dónaskapurinn. Kveðja og góða helgi, Gísli Páll, forstjóri Grundarheimilanna