Starfsfólk og heimilisfólk hefur undanfarna daga sameinast í því að skera út grasker og skemmta sér við að skoða útkomuna í húsinu. Á sumum stöðum er metnaðurinn meiri en annarsstaðar og bæði köngulóarvefir komnir upp, leðurblökur og allskyns skraut sem minnir á hrekkjavökuna, sem er í dag. 🍑 Það er eitthvað um að bæði starfsfólk og heimilisfólk fussi og sveii yfir þessum nýja sið á meðan aðrir hafa mjög gaman af umstanginu og skrautinu. Það er bara svona eins og er í lífinu sjálfu og þannig á það að vera þegar fólk býr á heimili eins og Grund. Það skapast líflegar umræður og sitt sýnist hverjum. Skoðið endilega þessi skrautlegu grasker ef þið eigið leið um Grund næstu daga.

Hér í Mörk gerðum við okkur dagamun á hrekkjavöku, skreyttum hátt og lágt og skárum út skraut og grasker. Margir gengu skrefinu lengra og settu upp grímur eða fóru jafnvel í búning. Skemmtileg tilbreytni sem lífgar upp á lífið og tilveruna

Thorvaldsensfélagið gaf Grundarheimilunum nýlega frábæra gjöf, þrjá svokallaða kúlustóla sem koma með skammelum og fer einn stóll á hvert heimili, á Grund, í Mörk og í Ás. Vængir leggjast yfir herð og bringu og lítil grjón eru í hálsstuðningi. Stólarnir umvefja og bæta líkamsvitund, auka vellíðan og öryggiskennd. Þyngdin, þrýstingur og hreyfing frá kúlum örvar vöðvaskyn. Grundarheimilin þakka af alhug þessa rausnarlegu gjöf og þann hlýhug sem Thorvaldsensfélagið hefur sýnt Grundarheimilunum um árin. Á myndinni er Karl Óttar Einarsson, forstjóri Grundarheimilanna, að taka við stólunum frá fulltrúum Thorvaldsensfélagsins, Kristínu Fjólmundsdóttur og Dóru Garðarsdóttur. Sigrún Faulk, framkvæmdastjóri hjúkrunar á Grund, situr í stólnum góða og sýnir hvernig hann virkar..... og gerir tilraun til að slaka á

Í vikunni var kaffihúsið Kaffi Grund formlega vígt Gísli Páll Pálsson, stjórnarformaður Grundarheimilanna, segir að aðstaða til að hittast og spjalla á Grund hafi verið ágæt en verði með þessari viðbót framúrskarandi góð. Það að eiga samskipti við annað fólk er einn mikilvægasti þáttur í góðri heilsu hvers og eins. „Okkur á Grund finnst hafa tekist feikn vel til með þessa aðstöðu, bæði inni og úti og kemur hún til með að gagnast heimilisfólki, aðstandendum þeirra, starfsmönnum og öðrum gestum um ókomna tíð. Þó að við séum að vígja þessa fallegu aðstöðu í dag er þannig málum háttað að við getum ekki hafið rekstur kaffihússins strax. Að fá rekstrarleyfi fyrir svona tiltölulega hógværri starfsemi er meira en að segja það. Við höfum um all langt skeið unnið að því að afla viðeigandi leyfa en þau eru því miður ekki komin í hús. Til að byrja með verður því aðstaðan einungis opin heimilisfólki og aðstandendum þeirra og boðið verður upp á kaffi og kleinur. ☕Vonandi styttist í að við getum opnað kaffihúsið og selt veitingar og þá eru nágrannar okkar í Vesturbænum líka hjartanlega velkomnir.“ Fljótlega í undirbúningsferlinu var ákveðið að fá listaverk í garðinn sem gestir kaffihússins gætu notið. Helgi Gíslason myndhöggvari tók verkið að sér og tengist listaverkið vatni og stendur við kaffihúsið í lítilli tjörn. Minningarsjóður Grundar greiddi fyrir verkið og vill þannig minnast allra þeirra heimilismanna sem dvalið hafa á Grund í 102 ár. Hönnun var í höndum ASK arkitekta og hönnun garðsins og umhverfis í höndum Landslags. Kjartan Örn Júlíusson tók myndir við þetta tækifæri.

Grund fagnaði 102 ára afmæli þann 29. október og af því tilefni var haldið afmælis- og foreldrakaffi í hátíðasal heimilisins tvo daga í röð, í gær og í fyrradag. Reyndar er talað um afmælis- og foreldrakaffi. Ástæðan er sú að þegar Grund var í byggingu kom Sveinn Jónsson í Völundi á fund stjórnarinnar og gaf peninga í byggingarsjóð en bað um að ávallt yrði haldið upp á brúðkaupsdag foreldra hans. Það hefur verið gert æ síðan og er nú gert í tengslum við afmælið

Síðasta föstudag fengum við að njóta yndislegra tónleika á vegum Óperudaga í Reykjavík. Þær Bryndís Guðjónsdóttir sópran og Eva Þyri Hilmarsdóttir píanóleikari komu til okkar fluttu lög og ljóð eftir íslenskar konur. Dásamlegir tónleikar og þökkum við þeim kærlega fyrir komuna.

Í síðustu viku héldum við í fyrsta skipti karlakvöld fyrir karla í 60+. Gísli Páll stjórnarformaður og Karl Óttar forstjóri héldu utan um kvöldið og voru með spurningakeppni. Boðið var upp á bjór og pretzel og einhverjir mættu í októberfest dressi. Mikil gleði og gaman. Viljum við þakka þeim sem mættu kærlega fyrir komuna. Á myndunum má sjá sigurlið spurningakeppninnar og spyrilinn.

Það var bleikur dagur í Mörk í gær og það fór sko ekkert á milli mála. Víða um húsið voru bleikar skreytingar. Bleik kaka var borin fram með kaffinu, heimilisfólk skartaði bleiku og meira að segja ferfætlingur hjá okkur var með bleika ól. Það er gaman að segja frá því að hér í Mörk býr Halldóra Árnadóttir en hún starfaði hjá Krabbameinsfélaginu og tók þá í því að stofna bleikan október.

Í síðustu viku lauk púttmótaröð sumarsins hjá pútthóp 60+. Mótið var í umsjón Júlíusar G. Rafnssonar fyrrum forseta Golfsambands Íslands. Spilaðir voru 2x18 holu hringir og þurfti að vera með í minnst þrjú skipti til að vera með í úrslitum. Verðlaun voru veitt fyrir vinningshafa í kvenna- og karlaflokki. Verðlaunin gáfu íbúarnir og hjónin Edda Svavarsdóttir og Birgir Björgvinsson, þökkum við þeim kærlega fyrir. Allir þátttakendur fengu golfkúlu með logo-i Grundarheimilanna fyrir þátttöku. Sigurvegari í kvennaflokki var Bára Sólveig Ragnarsdóttir, í öðru sæti var Hjördís Magnúsdóttir og í þriðja sæti var Edda Svavarsdóttir. Sigurvegari í karlaflokki var Guðmundur Davíðsson, í öðru sæti var Sturlaugur Grétar Filippusson og í þriðja var Sveinn Viðar Jónsson.

Stundum koma ferfætlingar í heimsókn á Grund og hún Fanney iðjuþjálfi tók tíkina sína Mýru með í vinnuna nýlega. Heimilisfólkið var yfir sig hrifið og móttökurnar eftir því. Það klappaði henni og knúsaði og svo fékk hún meira að segja volgan prjónapúða á mallakútinn sinn. 🐕 Næst þegar hún kemur í heimsókn og nálgast Grundina hér á Hringbraut hlýtur hún að dilla skottinu fáránlega hratt af gleð og tilhlökkun.