Jóhann Árnason kom á dögunum færandi hendi á Grund fyrir hönd Oddfellowstúkunnar Þorkels Mána með háa rafknúna göngugrind. Slíkt hjálpartæki mun koma sér afskaplega vel og er stúkunni hjartanlega þakkað fyrir þessa rausnarlegu gjöf og Jóhanni fyrir komuna. Hér tekur Gísli Páll Pálsson, forstjóri Grundarheimilanna við þessari góðu gjöf frá Jóhanni Árnasyni.

Þessir vösku herramenn frá Oddfellowstúkunni Ara Fróða komu aldeilis færandi hendi í Mörk í vikunni með styrk upp á hálfa milljón til kaupa á þjálfunarhjóli fyrir sjúkraþjálfunina hér í Mörk. Á mynd frá hægri: Daði Ágústsson, fyrrum meistari stúkunnar, Gunnar Magnússon, formaður Líknarsjóðs stúkunnar, Hafliði Hjartarson, stúkubróðir, Gísli Páll Pálsson forstjóri Grundarheimilanna og Sigurður Geirsson yfirmeistari stúkunnar. Þessum herramönnum er kærlega þakkað fyrir komuna og stúkunni fyrir höfðinglega gjöf.

Þó komið sé fram í desember erum við enn að taka upp gulrætur í gróðurhúsum okkar í Ási í Hveragerði. Það eru því glænýjar gulrætur sem heimilismenn á Grundarheimilunum eru að fá með matnum þessa dagana.

Það var jólapeysudagur á Grundarheimilunum í gær og mikið stuð. Heimilismenn dáðust að litskrúðugum peysunum og einstaka áttu sjálfir eitthvað rautt sem þeir skörtuðu starfsfólkinu til samlætis. Góður dagur á Grundarheimilunum þremur, Grund, Mörk og í Ási.

Nú hefur heimilisfólk á A2 verið útskrifað úr einangrun og því sóttkví aflétt. Deildin er nú opin fyrir heimsóknir en sem fyrr biðjum við alla að fara varlega og gæta að persónubundnum sóttvörnum. Áfram er grímuskylda. Þetta er dásamlegur dagur og ég veit að ástvinir ykkar bíða spenntir eftir að sjá ykkur😊

Jólin nálgast óðum og þá er að ýmsu að huga hér í Mörk eins og á öðrum heimilum. Undanfarið hefur ilmur af nýbökuðum smákökum borist um húsið, heimilin eru búin að skreyta hjá sér og jólaljósin lýsa upp skammdegið. Eins og áður sagði er að mörgu að huga á stóru heimili og eru aðstandendur beðnir að fara með heimilifólki yfir fatnað fyrir jólin, ganga úr skugga um að hann sé hreinn og passi, hengja hann upp á herðatré og merkja til dæmis aðfangadagur / jóladagur. Nauðsynlegt getur verið að hafa fatnað til skiptanna. Fer heimilismaður úr húsi um jólin? Það er ekki óalgengt að heimilismaður fari heim til ástvina yfir jólin. Nauðsynlegt er fyrir starfsfólk að vita hverjir verða ekki heima og þá hvaða daga. Biðjum við ykkur að láta starfsfólk vita og þau skrá hjá sér hverjir fara og hvenær. Aðstandendur eru beðnir að aðstoða sitt fólk vegna heimferðar og vinsamlegast athugið að koma í tíma þar sem stefnt er að því að hátíðarkvöldverður byrji kl.18 á aðfangadag í Mörk og starfsfólk því upptekið við borðhald á þeim tíma. Þá biðjum við ykkur þegar heim í Mörk er komið að aðstoða ykkar fólk eins og þið treystið ykkur til og að láta starfsfólk vita að viðkomandi er komin heim. Því miður getum við ekki boðið aðstandendum að borða með okkur yfir hátíðirnar þar sem sóttvarnarreglur mæla með að gestir dvelji ekki í sameiginlegum rýmum heimilisins heldur séu eingöngu inni á herbergjum ástvina sinna. Hinsvegar bendum við aðstandendum á að þeir eru ávallt velkomnir og notalegt getur verið að koma til dæmis eftir kvöldmat aðfangadagskvöld, njóta samveru með sínum ástvini og ef til vill aðstoða við að taka upp jólapakka. Hjólastólaleigubílar Þeir sem þurfa á þjónustu hjólastólabíla að halda er bent á að miklar annir eru á leigubílastöðvunum á milli kl.16-18 á aðfangadag og því getur borgað sig að panta bíl fyrr að deginum. Aðstandendur verða að sækja sitt fólk upp á heimili og aðstoða í leigubílana. Aðstandendum er bent á að panta hjólastólabíl í tíma. Nýr fatnaður Athugið sérstaklega að merkja allan nýjan fatnað með merkitúss með upphafsstöfum og herbergisnúmeri, þetta er nauðsynlegt þar sem búast má við að einhver tími líði þar til nýr fatnaður verður merktur af okkur. Guðsþjónusta Á aðfangadag er hátíðarguðsþjónust í Mörk kl.15:00. Prestur og kirkjukór Grensáskirkju sjá um guðsþjónustuna

Það er verið að baka víða á Grund, smákökuilmur tekur á móti manni í setustofum heimilisins. Nokkrar myndir sem teknar hafa verið undanfarna daga

Það var virkilega notalegt á Litlu Grund þegar heimilismenn sátu við jólatónlist og bökuðu smákökur síðastliðinn laugardag. Það var síðan boðið upp á nýbakaðar smákökur með kaffinu.

Fyrsta sunnudag í aðventu var kynnt ný ríkisstjórn Íslands undir forystu Katrínar Jakobsdóttur forsætisráðherra. Sömu stjórnmálaflokkar og á fyrra kjörtímabili, Framsóknarflokkur, Sjálfstæðisflokkur og Vinstri grænir. Flestir ráðherrar halda ráðherraembætti en tilflutningur þó sumra á milli ráðuneyta. Þá koma tveir nýir ráðherrar inn í hópinn þeir Jón Gunnarsson og Willum Þór Þórsson. Sá síðarnefndi nýr heilbrigðisráðherra en Willum var formaður fjárlaganefndar á síðasta kjörtímabili. Bind miklar vonir við Willum. Hann hefur góða innsýn í fjármál ríkisins og stofnana á fjárlögum og veit vel hvar skórinn kreppir. Meðal annars hjá hjúkrunarheimilum landsins. Stjórnarsáttmálinn er heldur þunn lesning og afar almennt orðaður. Þrátt fyrir að vera 60 blaðsíður þá er orðið hjúkrunarheimili ekki nefnt einu sinni. Í kaflanum um eldra fólk kemur orðið heimahjúkrun einu sinni fyrir. Þar er þó sagt að unnin verði aðgerðaráætlun til fimm ára í samstarfi við sveitarfélög, samtök eldri borgara og þjónustuaðila, jafnt opinbera sem sjálfstætt starfandi. Sú vinna verður væntanlega byggð ofan á og í framhaldi skýrslu eins manns nefndar Halldórs Guðmundssonar. Sem er vel. Sú skýrsla var um margt ágæt og prýðis grunnur til að byggja frekar ofan á. Ég hefði þó kosið aðeins skýrari nálgun á hvað stendur til að gera varðandi rekstur og fjármögnun þeirra rúmu tvö þúsund hjúkrunarrýma sem rekin eru hér á landi. Ég óska nýrri ríkisstjórn velfarnaðar í sínum störfum og vonast til að rekstrargrunnur hjúkrunarheimilanna verði tryggður á þessu kjörtímabili, og auðvitað vonandi til langrar framtíðar. Þar ber tvennt hæst. Sanngjarnar greiðslur fyrir þá þjónustu sem veitt er á hjúkrunarheimilunum auk þess sem að húsaleigugreiðslur er eitthvað sem verður að koma í rétt lag. Það er alls ekki sanngjarnt og rétt að ríkið komist upp með að greiða eingöngu þriðjunginn af þeim kostnaði sem hlýst af rekstri húsnæðis hjúkrunarheimilanna. Ef ekki kemur til úrbóta á þeim þætti drabbast núverandi húsnæði niður og verður ónothæft til hjúkrunaheimilisreksturs í framtíðinni. Kveðja og góða helgi, Gísli Páll, forstjóri Grundarheimilanna P.s. Í sáttmálanum er engin dagsetning sem segir til um hvenær hann er gerður eða til hvaða tímabils hann nær. Eitthvað sem afi minn heitinn Gísli Sigurbjörnsson hefði nú aldeilis ekki verið sáttur við. Og ekki ég heldur. Allt sem maður gefur frá sér á prenti eða alneti, tala nú ekki um ríkisstjórnarsáttmáli þriggja stjórnmálaflokka, verðskuldar dagsetningu. Sérstakt.